23

عید گھر پر گزارنے کا موقع پانے پر پلیئرز مسرور

زمبابوے سے لاہور پہنچنے کے بعد ایئرپورٹ پرریپڈ کورونا ٹیسٹنگ ہوئی۔ فوٹو: فائل

زمبابوے سے لاہور پہنچنے کے بعد ایئرپورٹ پرریپڈ کورونا ٹیسٹنگ ہوئی۔ فوٹو: فائل

 لاہور:  دورئہ جنوبی افریقہ اور زمبابوے کے بعد قومی کرکٹ اسکواڈ کی وطن واپسی ہوگئی جب کہ طویل ٹور کے بعد عید گھر پر گزارنے کا موقع پانے پر پلیئرز مسرور ہیں۔

طویل دورہ جنوبی افریقہ اور زمبابوے کے دوران بائیو ببل کی سختیاں جھیلنے والا پاکستانی اسکواڈ چارٹرڈ طیارے کے ذریعے لاہور واپس پہنچ گیا، علامہ اقبال ایئرپورٹ پر تمام کھلاڑیوں اور معاون اسٹاف ارکان کی ریپڈ کورونا ٹیسٹنگ ہوئی، نتائج آنے کے بعد سب اپنے گھروں کو روانہ ہوئے۔

واضح رہے کہ پاکستان ٹیم نے جنوبی افریقہ میں ون ڈے اور ٹی ٹوئنٹی سیریز میں کامیابی حاصل کی، اس کے بعد دورئہ زمبابوے میں 3 ٹی ٹوئنٹی میچز کی سیریز2-1 سے جیتی،ٹیسٹ سیریز میں پاکستان نے میزبان ٹیم کو2-0 سے وائٹ واش کیا۔

قومی اسکواڈ میں شامل کرکٹرز میں بیشتر تربیتی کیمپ کے آغاز سے دونوں ٹورز کے اختتام تک بائیو ببل میں رہے، صرف 11ٹیسٹ کرکٹرز نے بعد میں جوائن کیا تھا، طویل عرصے بائیو سیکیورٹی میں گزارنے والے کھلاڑیوں کو کم از کم اس بار عید گھر پر گزارنے کا موقع ملا ہے جس پر وہ خوشی کا اظہار بھی کررہے ہیں۔

بولنگ کوچ وقار یونس دورہ ادھورا چھوڑ کر آسٹریلیا روانہ ہوگئے تھے، ان کی اہلیہ کا عید کے بعد آپریشن ہے۔ قومی کرکٹرز کی اگلی مصروفیت پی ایس ایل ہوگی جس کے انعقاد اور وینیو کا فیصلہ ہونا ابھی باقی ہے۔

اس خبر پر اپنی رائے کا اظہار کریں

اپنا تبصرہ بھیجیں